Небагата жылі нашы дзяды-прадзеды. Перабіваліся часам з хлеба на квас. Але ж і ў іх былі святы з гасцямі, з песнямі за шчодрым сталом. І будні дзень, бывала, радаваў як свята, калі на стале з’яўляліся сытныя, духмяныя стравы.

ВЯЧЭРА

—   Чэрава, чэрава,

Чым ты павячэрала?

—   Павячэрала капустай,

Аржанога хлеба лустай,

Свежасмажаным ліном,

Свежаспечаным бліном,

Бабкаю з начынкаю,

Сальцісонам,

Шынкаю,

Хатняю каўбаскаю,

Вантрабянкай наскаю.

А яшчэ былі,

Канешне,

І мачанка,

І яешня,

Сала,

Грэчневая каша,

І смятана,

Сыракваша…

Усяго і не панесці.

А ўсё роўна хачу есці…

                                            Г. Бураўкін

Выданне знаёміць са стравамі беларускай кухні, якія раней гатавалі жыхары вёскі Вайцяшын ў паўсядзённым жыцці і падчас свят. Дарэчы, вельмі многія старадаўнія стравы гатуюцца і сёння і з’яўляюцца сапраўдным упрыгожваннем стала, робяць сучаснае меню болей вытанчаным, разнастайным, карысным.

Рэцэпты страў запісала з вуснаў жыхарак вёскі Вайцяшын Рудзьман Алены Фёдараўны, Цімафейчык Надзеі Аляксееўны, Чарных Марыі Ільінічны бібліятэкар Вайцяшынскай сельскай бібліятэкі  Л. І. Рудзьман.